Лице кое работело за американската влада е обвинето за објавување доверливи информации за проценките на претходниот израелски план за напад на Иран, објави денеска Асошиејтед прес.
Обвинетиот Асиф Вилијам Рахман беше уапсен од американската Федерална полиција (ФБИ) оваа недела во Камбоџа. Прво ќе се појави на суд во Гуам.
Рахман минатата недела беше обвинет пред американскиот суд во Вирџинија по две точки од обвинението за свесно пренесување информации за националната безбедност, кривично дело што може да носи долга затворска казна.
Не е јасно дали има адвокат или во која федерална агенција бил вработен, но официјалните лица рекоа дека имал пристап до строго доверливи информации.
Протечените документи кои се припишуваат на Националната агенција за геопросторно разузнавање и Националната агенција за безбедност се појавија во октомври на апликацијата Телеграм.