После шест години, за денеска најавен првиот комерцијален лет од главниот град на Јемен

Од:

После шест години прекин во авиособраќајот за денеска е планиран првиот комерцијален лет од аеродромот во главниот град на Јемен.

Планирано да се реализира првиот комерцијален лет на државниот авиопревозник „Јемен Ервејс“ со повратен лет на редовна линија од Сана до јорданската престолнина Аман.

Аеродромот во Сана од август 2016 година е затворен за комерцијални летови, а контрола врз аеродромот има Сојузот предводен од Саудиска Арабија што е во судир со Хутите.

Во Јемен од крајот на 2014 година се води оружен конфликт меѓу владините сили поддржани од Саудиска Арабија и Хути бунтовниците поддржани од Иран.

Специјалниот пратеник на ОН за Јемен, Ханс Грундберг, изрази задоволство од најавуваниот и долгоочекуван чекор.

„Го поздравувам објавувањето на првиот лет од аеродромот во Сана по шест години…Честитки до сите Јеменци за овој толку потребен и долгоочекуван чекор. Ќе продолжам да работам со страните за да се осигурам дека се одржуваат сите елементи од примирјето и да се надоврзам на неговиот моментум кон одржливо политичко решение на конфликтот“, објави во четвртокот Грундберг преку својот „твитер“ налог.

Условите за првиот комерцијален лет се создадени благодарение на двомесечното примирје во земјата договорено од завојуваните страни во конфликтот, што стапи во сила на почетокот на овој месец, истовремено со светиот муслимански месец Рамазан.

Примирјето предвидува прекин на сите воени операции во Јемен и надвор од земјата, со дозвола за влез на бродови со гориво во пристаништето Ходеида во западен Јемен и договорени два комерцијални лета седмично од Сана до Јордан и Египет.

Извор: МИА

Би можело да ве интересира

Жесток напад на САД и Британија на неколку градови во Јемен, има мртви

Катерина Ѓуровски

САД и Велика Британија започнаа нови напади врз Хутите во Јемен

(ВИДЕО) Иран ги трие рацете; Хутите ја запленија американската „жолта направа“

Нови напади во Јемен, експлозија во Црвеното Море: Погоден американски брод

Горан Наумовски

(ВИДЕО) Одмазда за погодениот танкер: американско-британски воздушен напад врз важно пристаниште во Јемен

Јеменските бунтовници се заканија: Американските и британските воздушни напади „нема да останат без одговор“