Поранешниот градоначалник на рускиот град Краснодар, Андреј Алексејенко е назначен на чело на новата влада во североисточна Украина што ја постави Русија, јави денеска руската агенција ТАС, а пренесе Ројтерс.
Андреј Алексејенко вчера поднесе оставка од функцијата градоначалник на Краснодар, 16-тиот по големина град во Русија.
Според агенцијата ТАС во извештајот кој се повикува на уредбата на локалната администрација, Алексејенко сега ќе го предводи новиот совет на министри во провинцијата Харков назначен од Русија.
Руските власти претходно најавија дека областите што ги зазедоа во Украина никогаш нема да се вратат под контрола на Киев и дека референдумите за нивно пристапување кон Русија би можеле да се одржат наесен.
Украина ги нарече „псевдо референдуми“ и вети дека ќе ги спречи.
Руските сили во моментов контролираат помалку од половина од Харковската област, според Ројтерс.