Саудиска Арабија ги соопшти мерките за заштита од коронавирусот за околу илјада верници на кои ќе им биде дозволено да одат на аџилак во јули во Мека.
Како што беше соопштено денеска, верниците ќе можат да земаат исклучиво флаширана вода од бунарот Земзем во дворот на Големата џамија во Мека.
За една од фазите на аџилакот, ритуалот каменување, ќе се користат само претходно стерилизирани и спакувани камења.
Годинава, по првпат, верниците од странство нема да дојдат во Саудиска Арабија, каде обично има околу 2,5 милиони луѓе на аџилак.
Аџии од земјата ќе бидат избрани од редот на здравствените и безбедносните работници кои се опоравиле од Ковид-19, во знак на благодарност за нивната работа за време на пандемијата.
Аџилакот годинава ќе им биде дозволено само на оние на возраст меѓу 20 и 50 години, карантинот ќе биде задолжителен пред и по аџилакот и сите ќе бидат тестирани на коронавирусот.
Во Саудиска Арабија речиси 2.000 луѓе починаа од Ковид-19, а повеќе од 200 000 се заразени со коронавирусот.