Претседателите на Европската комисија и на Европскиот совет денеска се сретнуваат со полскиот претседател, Анджеј Дуда, главна тема на разговори е безбедноста, јавува дописничката на МИА во Брисел.
Дуда утрово се сретна со претседателката на Европската комисија, Урсула фон дер Лајен, со која разговарал за Русија и Украина.
-Добра размена со претседателот Анджеј Дуда за безбедносната состојба и военото засилување на Русија. Темелно ја координираме нашата подготвеност, вклучително и за набавката на енергија, и за санкциите како одговор на секаква дополнителна ескалација, напиша фон дер Лајен на Твитер по средбата.
На средбата станало збор и за судскиот систем во Полска, кој е под лупа на Европската комисија. Повеќе прекршочни постапки се водат против Варшава, а Европскиот суд за правда изрече и парична казна против Полска поради поткопување на независноста на судството.
Сепак главна тема останува ситуацијата на руско-украинската граница, каде Европската унија и НАТО сметаат дека присуството на руските воени сили е неоправдано и се подготвуваат санкции во случај на руска агресија.
Попладнево Дуда се сретнува со претседателот на Европскиот совет, Шарл Мишел за разговори на таа тема.
Извор: МИА