Русија ги повика Соединетите Американски Држави и Кина да соработуваат затоа што нивната размена на обвиненија, како што соопшти Кремљ, е „невкусна“ во период на пандемија.
– Во рамки на заедничките напори за борба против пандемијата, тоа изгледа невкусно, изјави Дмитриј Песков, портпарол на рускиот претседател, Владимир Путин, одговарајќи на прашање во врска со односите меѓу Вашингтон и Пекинг, јави ТАСС.
– Секако, ние повеќе сакаме да видиме интеракција, соработка и меѓусебна помош наместо овие размени, рече Песков.
Тој потсети дека Москва развива блиски и партнерски односи со Пекинг и дека и понатаму ќе го прави тоа.
– Ние соработуваме и си помагаме едни на други во борбата против коронавирусот, во развојот на вакцина. Разменуваме информации. Исто така, имаме контакти со Американците, додаде Песков.