Околу 15 милиони дози на вакцината против коронавирус „Џонсон и Џонсон“ се уништени поради фабричка грешка во САД. Фармацевтскиот гигант соопшти дека идентификувал серија дози во фабрика во Балтимор водена од „Emergent BioSolutions“ што не ги исполнувале стандардите за квалитет, но не ја потврди точната бројка.
„Квалитетот и безбедноста продолжуваат да бидат наш врвен приоритет“, велат од компанијата.
Агенцијата за храна и лекови соопшти дека е запознаена со ситуацијата, но одби да даде коментар.
„Џонсон и Џонсон“ соопштија дека испраќаат експерти за контрола, насочување и одржување на целото производство на вакцини што ќе овозможи да испорача дополнителни 24 милиони дози во април.
Фабриката „Emergent BioSolutions“ се уште не добила дозвола од американските регулатори за производство, но американските медиуми објавија дека се очекува да произведе десетици милиони дози во блиска иднина.
Американскиот претседател Џо Бајден официјално објави во март дека владата ќе купи уште 100 милиони дози вакцина против Ковид-19 од таа компанија. Со дополнителните 100 милиони дози од Џ/Џ, администрацијата сака да се осигура во случај на проблеми со производството со Фајзер и со Модерна.