Вооружен тинејџер отворил оган кон автобус и постојка во градот Бор во регионот на Нижни Новгород, убивајќи четворица луѓе, јавија руските медиуми.
Во нападот што се случи доцна попладнево, тешко се повредени и три жени, соопшти полицијата.
Според локалните медиуми, момчето родено во 2002 година, идентификувано како Данил Монахов, прво имало расправија со сопствената баба, која ја застрелал во нејзината куќа, каде и самиот живеел.
По ова, Монахов пукал и во сосед на жената, кој притрчал кога ги слушнал истрелите. Напаѓачот извадил друг пиштол, излегол на улицата и пукал во автобус кој стоел на постојка полна со луѓе.
Полицијата соопшти дека се уште трага по вооруженото 18-годишно момче, кое според очевидците, по нападот избегало во правец на блиската шума.