Министрите за надворешни работи на Г-20 денеска во Матера, јужна Италија, ќе разговараат за борбата против пандемијата на коронавирусот, заштитата на климата и помошта за Африка.
Групата од 20 најголеми економии во светот ги вклучува САД, Кина, Индија, Русија, Германија и ЕУ.
Преговорите во Матера доаѓаат пред самитот на лидерите на Г-20 во Рим кон крајот на октомври.
Германскиот министер за надворешни работи Хајко Маас пред разговорите рече дека фокусот ќе биде насочен кон помагање на глобалната економија да се опорави од кризата со коронавирусот и да се соочи со идните здравствени предизвици.
– Сега е време да се приспособат глобалните здравствени структури на идните здравствени кризи, рече Маас.
Г-20 веќе ги договори принципите за поблиска соработка на виртуелниот Светски самит за здравје во мај. Според нив, повеќе не треба да има забрани за извоз или тесни грла во синџирот на снабдување, како што имаше во оваа пандемија.
Состанокот на Г-20 означува и крај на еднонеделната турнеја на државниот секретар на САД, Ентони Блинкен во Европа.