Германија сака да гради конструктивни односи со Русија, за што јас секогаш се залагав како канцеларка и ќе продолжам да го правам тоа, изјави денеска германската канцеларка Ангела Меркел во интервју за весникот „Либекер Нахрихтен“.
Таа додаде дека секогаш е подготвена да ги продолжи преговорите со рускиот претседател Владимир Путин.
Меркел во интервјуто за германскиот весник посочи и дека не ја исклучува можноста за испраќање на оружје во Ирак, но оти се уште не е донесена конечна одлука за тоа.
– Страдањата на луѓето во северен Ирак што ги предизвика терористичката организација Исламска држава се страшни и меѓународната заедница мора да го запре напредувањето на екстремистите и да им помогне на загрозените. Затоа треба да се обезбеди хуманитарна помош и опрема за тие што се борат со терористите, наведе Меркел.
Таа додаде дека Германија ги усогласува своите постапки со партнерите, првенствено со САД.