Судиите на Меѓународниот суд на правдата му наложија на Азербејџан да спречи поттикнување расна омраза против Ерменците, а во исто време донесе речиси идентична пресуда против Ерменија.
Ерменија го пријави Азербејџан до МСП за кршење на Конвенцијата против расна дискриминација, а Азербејџан поднесе противтужба во која се наведува дека ја прекршил истата конвенција на ОН.
„Двете страни треба да се воздржат од каков било чин што може да го влоши или одолговлекува спорот пред судот или да го отежне неговото решавање“, рече судијката претседавач на МСП, Џоан Доногју.
Во октомври минатата година, азербејџанските трупи ги протераа етничките ерменски сили од областите што ги контролираа од и околу регионот Нагорно-Карабах од 1990-те, пред Русија да посредува за прекин на огнот.
Судот наведе дека Азербејџан, според договорот на ОН за антидискриминација, мора „да ги преземе сите неопходни мерки за да спречи поттикнување и промовирање расна омраза и дискриминација, вклучително (такво однесување) на неговите службеници во јавните институции насочени кон луѓе од ерменска националност или етничко потекло“.
Дополнително, судијката Џоан Доногју рече дека Азербејџан мора да ги заштити од насилство и штета „сите лица заробени во врска со конфликтот во 2020 година, кои остануваат во притвор“ и „мора да го спречи и казни вандализмот и сквернавењето на ерменското културно наследство“.
МСП ја осуди Ерменија речиси идентично, барајќи од неа да стави крај на дискриминацијата и поттикнувањето омраза кон Азербејџан.