Брачен пар од Велика Британија кои ги мачеле децата, ги оставале да гладуваат, ги туширале со врела вода и ги хранеле со сапун, се прогласени за виновни за повеќе точки од обвинението за злоупотреба на деца. Децата на Шерил Пиклс (35) и Ендру Хадвин (39) биле толку гладни што пешачеле повеќе од 6 километри за да пребаруваат низ корпите од супермаркетите во 4 часот наутро.
Кога го пријавиле злоставувањето на доверливо возрасно лице и случајот дошол во полиција, Хадвин и Пиклс ги фатила паника, фалсификувале писма и рекле дека нивните деца ги напишале, пишува Дејли мејл. „Жал ни е, лажевме“, пишувало во писмата. Експерт за ракопис подоцна утврдил дека писмата се лажни, односно дека не се работи за детски ракопис.
Полицијата започна истрага во 2018 година, по пријава за можна злоупотреба. Истрагата траела четири години, во текот на која детективите испрашале повеќе од 150 сведоци. Откриле дека Хадвин и Пиклс ги принудувале децата да јадат сапун и да се тушираат со врела вода, ги затворале во плакари и ги изгладнувале.
Децата често барале остатоци од храна на улица, а во една прилика биле затекнати како пешачат до супермаркетот во 4 часот наутро во потрага по храна. Парот нарачувал храна, а потоа ги терале децата да ги гледаат додека јадат, пишува Дејли мејл.
Тие беа прогласени за виновни за повеќекратни прекршоци за занемарување на деца во Судот во Дурам. Хадвин беше обвинет и за три точки за силување на малолетничка. Ним им беше одреден притвор до 28 април, кога ќе им биде изречена пресудата.