Лидерот на британската опозициска Лабуристичка партија, Џереми Корбин ја повика премиерката Тереза Меј да поднесе оставка, поради загубите, кои ги претрпе нејзината партија на вчерашните парламентарни избори.
– Таа загуби места на конзервативците, загуби гласови, ја загуби поддршката и довербата. Тоа е доволна причина да си оди и да и го отстапи местото на влада, која ефикасно ќе ги претставува луѓето на таа земја, рече Корбин.
Меј изјави дека Велика Британија има потреба од стабилност и таа ќе преземе одговорност да ја обезбеди, ако освои најмногу места во Парламентот.
– Ако се покажат како правилни прогнозите дека Конзервативната партија освоила најмногу места и веројатно најмногу гласови, на нас ќе падне задачата да го обезбедиме тој период на стабилност и точно тоа и ќе го сториме, рече Меј, откако беше реизбрана во својот округ Мејднхед.
Според излезна анкета, објавена по изборите, конзервативците го загубиле апсолутното мнозинство во Долниот дом на Параламентот.