Рускиот министер за надворешни работи Сергеј Лавров претстави нов услов за завршување на војната во Украина. За време на прес-конференција Лавров рече дека конфликтот ќе заврши само кога Украина веќе нема да е воена закана за Русија. Лавров, исто така, рече дека загриженоста за безбедноста на неговата земја е една од главните причини за војната, која почна со руската инвазија на 24. февруари минатата година.
„Украина, како и секоја друга територија што се граничи со Русија, се разбира, не треба да биде домаќин на воена инфраструктура што претставува директна закана за нашата земја“, рече Лавров, зборувајќи за тоа што би било потребно за да се стави крај на војната. Тој додаде дека „целите на специјалната воена операција не се измислени“, туку се „дефинирани од основните, легитимни безбедносни интереси на Руската Федерација“.
Коментарите на Лавров уследија откако продолжуваат шпекулациите дека рускиот претседател Владимир Путин наскоро може да започне нова мобилизација за да започне нова офанзива во Украина.
Институтот за војна проценува дека неодамнешните знаци во Русија укажуваат на тоа дека Путин може да најави втор бран на мобилизација во наредните денови, а рускиот министер за одбрана Сергеј Шојгу вчера најави дека Путин ќе издаде директива за спроведување на големи воени реформи во следните неколку години.
Во неделите пред новата година, официјални лица од Украина и Русија сугерираа дека се отворени за мировни преговори. Сепак, ниту една вистинска шанса за мировни преговори не можеше да добие замав бидејќи страните не се согласија за основните прашања како што е признавањето на четирите украински територии – Донецк, Херсон, Луганск и Запорожје – анектирани од Русија во септември.