Нападите во Париз на Западот му помогнаа да сфати дека приоритет во Сирија е борбата против Исламска држава, а не соборувањето на претседателот Башар ал-Асад, изјави денеска рускиот министер за надворешни работи Сергеј Лавров.
Лавров, како што пренесува Танјуг, го повторил ставот на Москва дека сириската криза не може да се реши на мирен начин без Асад, кој ги претставува интересите на значаен дел од сириското општество.
-Не се остварија сите прогнози на нашите западни и други колеги дека народот ќе се крене во знак на револт и ќе го собори Асад. Тоа само значи дека Асад ги претставува интересите на мнозинството од сириското општество и затоа мирното решение без неговата улога не може да биде најдено, нагласи Лавров, а пренесе ТАСС.
Лавров наведе и дека обидите на НАТО да ги засили своите сили во близина на руските граници се „евтин трик“.