Јапонија нема да учествува во договорот на Меѓународниот олимписки комитет (МОК) и Кина во обезбедувањето вакцини за учесниците на Олимписките игри во Токио и Зимските олимписки игри во Пекинг 2022 година.
Јапонската министерка Тамајо Марукава денеска изјави дека МОК не ја консултирал Јапонија за кинеските вакцини и додаде дека јапонските спортисти нема да ги примат. Таа изјави дека тие вакцини не се одобрени во Јапонија.
– Презедовме сеопфатни мерки за да овозможиме учество на Игрите и без вакцинација. Нашиот принцип дека вакцинацијата не е предуслов за учество не е променет, рече Марукава.
Таа исто така посочи дека Игрите ќе се одржат како да не се достапни вакцини, потпирајќи се на тестови, маски, физичка оддалеченост и држејќи ги спортистите во „балони“.
Меѓународниот олимписки комитет првично инсистираше на тоа дека нема да бара спортистите да бидат вакцинирани, туку само ќе ги поттикне да го сторат тоа.
Сепак, МОК и Кина вчера се договорија да им понудат вакцини на спортистите и тимовите кои се подготвуваат за Олимписките игри во Токио и Зимските олимписки игри во Пекинг.
– Дистрибуцијата на кинеската вакцина ќе се изврши преку меѓународни агенции или постојните договори за вакцини што земјите ги имаат со Кина, изјави претседателот на МОК, Томас Бах.
Тој рече дека МОК ќе плати дополнителни дози за олимпијците и параолимпијците, но не ги наведе трошоците.
Бах исто така рече дека „значителен број олимпијци веќе се вакцинирани“, но не ги именуваше земјите.
– МОК ќе се потруди да има што повеќе вакцинирани учесници на Олимписките и Параолимписките игри во Токио, рече Бах.
Олимписките игри во Токио ќе се одржат од 23 јули до 8 август.