Иранските медиуми отсега ќе имаат рок од 60-минути за да ги поправат наводните дезинформации, соопшти денеска киберцентарот на земјата, пренесува ДПА.
Според соопштението издадено од центарот, информативните служби се обврзани да ги коригираат пријавените дезинформации во рок од 60 минути. Исто така, во рок од 24 часа треба да се обезбеди позадина на настаните од вестите.
Киберцентарот одговара пред Совет основан од духовниот водач ајатолахот Али Хамнеи, кој се занимава со сите прашања во врска со „опасностите од интернетот“. Меѓународната организација за заштита на медиумите Репортери без граници (РСФ) смета дека Советот е орган за цензура.
Политичката елита постојано ги обвинува странските земји и социјалните медиуми за избувнувањето на националните протести во Иран. Набљудувачите го гледаат ова како обид да се одвлече вниманието од вистинските причини за немирите, предизвикани од смртта на Иранката Џина Махса Амини. 22-годишната девојка беше уапсена во средината на септември поради кршење на исламските правила за облекување и почина во притворската болница. Најмалку 450 демонстранти се убиени во демонстрациите што следеа по нејзината смрт.
Извор: МИА