Групата Исламска држава во текот на минатата година загубила приближно една четвртина од својата територија, кога повеќе странски воени сили ја ставија под жесток притисок на различни фронтови во Сирија и Ирак, пренесоа американските медиуми.
Во вчера објавениот извештај на Центарот за прашањата на тероризмот и екстремизмот на компанијата ЕХС „Џејнс“ се посочува дека територијалните загуби на ИД се „без преседан“ и се прогнозира дека џихадистите од Исламска држава во текот на оваа година ќе бидат потиснати од северниот ирачки град Мосул.
Во летото 2014 година ИД спроведе екстремно брза окупација на огромни делови од Ирак, заземајќи приближно една третина од неговата територија.
Ирачките сили, поддржани од САД, оттогаш постепено повратија неколку поголеми и помали градови и неделава соопштија дека повторно контролираат поголем дел од Источен Мосул.
Курдските сили и сириските опозициски формации, поддржани од САД, истовремено ја потиснаа „Исламска држава од повеќето региони во северна Сирија.