Пожар изби утринава во Берлин, по неколку експлозии на полицискиот полигон за уништување и складирање експлозивни направи, а потоа се прошири на околната шума Груневалд на југозападниот дел од градот.
– Пожарот се прошири на површина од еден и пол хектар. И понатаму не е под контрола, изјави портпаролот на берлинската противпожарна служба.
Гаснењето на пожарот го спречуваат и други експлозии, предизвикани од него.
Пожарникарите сведочат за големи метални предмети што паѓаат во околната шума, по секоја експлозија.
Засега не е познато што ја предизвикало првата експлозија на полигонот.
Полицијата на ова подрачје среде шумата Груневалд складира и уништува експлозиви и пиротехнички средства.
„Ситуацијата е непрегледна, пожарот и понатаму не е под контрола и затоа ги предупредуваме граѓаните да го избегнуваат ова подрачје“, соопшти противпожарната служба.
Берлинскиот Сенат, владата на федералната покраина Берлин, изрази загриженост затоа што пожарот поради долготрајна суша и сува вегетација може брзо да се прошири.
На новинарско прашање, околу постоењето полигон за уништување експлозивни средства среде шума, портпаролот на Сенатот одговори дека со тоа прашање ќе се позанимава „откако пожарот ќе биде изгаснат“.
Поради пожарот, прекинат е железничкиот и патниот сообраќај на важни патни правци од југозападниот дел кон центарот на Берлин.
Изминатите денови во Берлин и околината се забележани невообичаено високи температури. За денеска се најавени 38 степени.
#Brand am #Kronprinzessinnenweg in #Nikolassee. Aktuell brennt es im Grunewald und es kommt zu Explosionen. Die ersten Einsatzkräfte haben den Brand bestätigt und großzügig nachalarmiert. Die @Berliner_Fw ist mit über 100 Kräften vor Ort.
Update folgt… pic.twitter.com/YlBWGk1YzF— Berliner Feuerwehr (@Berliner_Fw) August 4, 2022
Извор: МИА