Социјалните мрежи Фејсбук и Твитер денеска отстранија видео кое го објави американскиот претседател Доналд Трамп, поради ширење дезинформации за коронавирусот.
На снимката, што ја сподели Трамп, која и покрај забраните и натаму се шири на социјалните мрежи, се прикажани група лекари кои изнесуваат погрешни и непотврдени информации поврзани со пандемијата. Според „Вашингтон пост“, повеќе од 14 милиони луѓе го гледале видеото на „Фејсбук“. Во него, меѓу другото, се вели дека маските не се неопходни за да се запре болеста
„Твитовите што го придружуваа видеото ја нарушуваат нашата политика во врска со дезинформации за Ковид-19“, изјави портпарол на Твитер за американските медиуми.
Портпаролот на Фејсбук, пак, потврди дека видеото синоќа е повлечено и од таа социјална мрежа.
„Ние го избришавме видеото затоа што споделува невистинити информации за лекови и третмани за Ковид-19“, објасни портпаролот на Фејсбук.