Вкупно 34 земји во светот, од кои 80 проценти се од Африка, немаат доволно храна за населението поради конфликти, суша и поплави, се наведува во вчера објавениот извештај на Организацијата за храна и земјоделство на Обединетите нации (ФАО).
Во извештајот за претстојната реколта и ситуацијата во сферата на производството на храна се истакнува дека сушата е поврзана со климатската појава Ел Нињо. Во регионот на централна Америка и Карибите сушата, поврзана со Ел Нињо може трета година по ред да ја погоди сеидбата на основните земјоделски производи.
Поради сушата се очекува и пад на производството на храна во Алжир и Мароко.
Прогнозата на ФАО за производство на пченица во 2016 година е дека ќе бидат ожнеани 723 милиони тони. Тоа се десет милиони тони помалку од рекордната жетва во 2015 година.