Европската комисија го усвои годишниот буџет за хуманитарна помош, тој изнесува 1,5 милијарди евра од кои 152 милиони за Балкан, Украина, Кавказ и Турција, јави дописничката на МИА од Брисел.
Европската комисија смета дека со 1,5 милијарди евра алоцирани за хуманитарна помош, Европа ќе биде водечка сила во оваа област во време кога хуманитарните кризи се множат, како поради природни фактори така и поради човечки.
-Хуманитарните потреби се на највисоко ниво и ќе продолжат да растат. Ова пред сѐ се должи на конфликти но сѐ повеќе и на глобални предизвици како климатските промени и Ковид-19. Нашиот хуманитарен фонд ќе овозможи ЕУ да го направи своето и да продолжи да спасува животи и да ги покрива основните потреби на засегнатите, изјави Јанез Ленарчич, еврокомесар за хуманитарна помош.
Тој додаде дека со овој буџет Европската Комисија ќе биде во можност да одговори на акутните кризи како и на долготрајните од типот на Јужен Судан, Колумбија и Рохингите во Мјанмар.
Буџетот за 2022 е поделен на повеќе географски области. Балканот заедно со Кавказот, Украина и бегалците во Турција ќе добијат 152 милиони евра за разни проекти.
Најголем дел од буџетот се алоцира за супсахарска Африка со 469 милиони евра, и 352 милион евра за Блискиот Исток и Северна Африка. Азила и Јужна Америка ќе добијат околу 188 милиони евра, и конечно Европската Комисија задржува 370 милиони евра за непредвидливи кризи и катастрофи.
Извор: МИА