Украински форензички експерти досега ископале 146 тела, главно цивили, од масовна гробница во близина на градот Изјум во источна Украина, а некои тела имаат знаци на насилна смрт, изјави денеска регионалниот гувернер. Претседателот Володимир Зеленски рече дека верува оти околу 450 тела биле закопани во шума на периферијата на Изјум, која неодамна беше вратена од украинските сили за време на контраофанзивата во регионот Харков.
„Има тела со знаци на тортура“
Олех Синехубов, гувернер на регионот Харков, изјави дека меѓу ексхумираните тела има тела на две деца. „Некои од загинатите имаат знаци на насилна смрт. Има тела со врзани раце и траги од тортура. Кај мртвите се пронајдени и рани од експлозив, шрапнели и убодни рани“, напиша Синехубов на Телеграм.
Форензичарите со денови работеа на ексхумација и идентификација на телата, чии импровизирани гробници беа обележани со дрвени крстови. Портпаролот на Кремљ, Дмитриј Песков, во понеделникот ги отфрли обвинувањата на Украина како „лажни“. Жителите претходно изјавија дека во некои гробници во шумата биле закопани луѓе кои загинале во руски воздушен напад.