На две недели пред изборите, Трамп е во офанзива, но Бајден има предност во анкетите

Од:

Двајцата претседателски кандидати, републиканецот Доналд Трамп и демократот Џо Бајден, ги интензивираа кампањитe со митинзи и настапи во пресрет на изборите на 3 ноември.

На настапите вчера во Невада, Трамп го нападна Бајден со прогноза за „голема депресија“ во случај на негова победа.

-Гласањето ќе биде избор меѓу супер оздравување на земјата и депресија на Бајден, рече тој во Лас Вегас.

Тој исто така ги окарактеризира претстоечките избори како избор „меѓу сигурни граници и отсуство на граници, меѓу поддршка за полицијата и стопирање на финансиите за неа, меѓу добивање на вакцина во рекордно време за победа над вирусот и затворање на Америка од Бајден за убиство на економијата“.

Трамп исто така истакна дека ако неговиот опонент дојде на власт ќе ги покачи даноците, и го опиша како „најдосадниот човек на светот“. Актуалниот претседател викендов оддржа митинзи уште и во Мичиген, Висконсин и Калифорнија, на големи собири на отворено, претежно на аеродромски писти, но медиумите прикажуваа слики на толпи луѓе без маски.

Бајден, пак, во саботата намина во својот дом во Делавер и направи пауза, а во неделата беше на црква, а потоа замина да митингува само во Северна Каролина.

Сепак, и покрај активната кампања и обидите да придобие гласови во руралните подрачја на САД, Трамп во анкетите е зад Бајден.

Анкета на Си-би-ес, укажува дека Бајден води во две клучни „фронтови држави“, во Висконсин со седум проценти и резултат 51 отсто наспроти 41 отсто, држава во која победи во 2016 година. Тој исто така води и во типично републиканската Аризона (50:47), каде последниот демократ кој таму победил бил Бил Клинтон во 1996 година.

Во меѓувреме, продолжува и предвременото гласање. До вчера, повеќе од 27 милиони Американци гласале лично или по пошта, рекорд во историјата на САД, покажувајќи колку пандемијата го смени политичкиот пејзаж на земјата и колку избирачите се политички наелектризирани.

Следната дебата меѓу Трамп и Бајден е неделава в четврток, и многумина предупредуваат дека однесувањето на кандидатите на оваа, трета и последна дебата, пред сѐ на актуелниот претседател, ќе придонесе многу во конечниот резултат на изборите.

Порталот Аксиос дозна дека дебатните советници на Трамп му препорачале да не врши такви упади и прекини во говорот на Бајден како на првата дебата, и да го остави да зборува.

– Не го спасувајте. На Бајден ќе му залута мислата, самиот ќе се препне и ќе почне да мрмори, го советувале Трамп, пренес Аксиос.

Се додава дека советнците му кажале на Трамп „сѐ што треба да направиш е да им дадеш дозвола на луѓето да гласаат за тебе“, како на дебатата со неговата противкандидатка, Хилари Клинтон, во 2016 година.

Би можело да ве интересира

Американците испратија ракетен разорувач со наведувано ракетно оружје кон Црно Море

Ана Ололовска

Русија жали поради повлекувањето на САД од Договорот за отворено небо

Ана Ололовска

Кандидати на Бајден за врвот на идната администрација

Ана Ололовска

Фаучи: Имунитетот на стадо во САД е можен само со доволен број вакцинации

Ана Ололовска

Си-Ен-Ен: Од почетокот на ноември со коронавирус се заразени три милиони Американци

Ана Ололовска

САД би можеле да почнат со вакцинација за Ковид-19 веќе на почетокот од декември

Катерина Павлова-Николовска