Утрово израелските сили бомбардираа воен комплекс на исламистичкото движење Хамас во Појасот Газа како одговор на истреланата ракета, која падна на отворено подрачје во јужниот дел на Израел.
Во инцидентот нема повредени, објавија израелските медиуми, а според палестинските извори причинета е материјална штета откако биле погодени Кан Јанус во јужниот дел и Деир ел-Балах во централниот дел на Појасот Газа.
Од 6 декември откако американскиот претседатал Доналд Трамп го призна Ерусалим за главен град на Израел, Палестинците од Газа истрелаа 18 ракети и мини. Ракетите ги истрелуваат воглавно помали палестински екстремистички организации, но за Израел, Хамас е одговорен за насилството.
– Откако пред две недели уништивме тунел кој навлегуваше на наша територија, Израелските одбранбени сили (ИДФ) нападнаа околу 40 цели на Хамас, изјави премиерот на Израел, Бенјамин Нетанјаху во неделата на владина седница.