Белгија, која сѐ уште нема федерална влада по мајските парламентарни избори, не успева да се договори за кандидат за еврокомесар. Рокот истекува на 26 август.
Белгија е една од петте земји кои сѐ уште не назначиле кандидат за еврокомесар во новиот состав на Европската Комисија, кој треба да стапи на функција на први ноември, под водство на Германката Урсула фон дер Лејен.
Името кое најчесто се споменува во Белгија е на досегашниот министер за надворешни работи, Дидие Рејндерс од редовите на либералите. Но, за да биде одобрена неговата кандидатура треба да се согласат сите политички партии.
Според непишано правило, европскиот комесар од Белгија една година доаѓа од редовите на франкофонските политичари, а другата од фламанската политичка сцена, за да се запази јазичната рамнотежа.
Досегашната еврокомесарка Мариан Тејсен доаѓаше од фламанската демохристијанска партија ЦДВ.
Меѓутоа од партијата на социјалистите, една од најголемите белгиски партии, негодуваат за изборот на Рејндерс и сметаат дека е неоправдано и еврокомесарот и претседателот на Европскиот Совет да бидат од истата политичка партија. За потсетување, земјите членки на ЕУ во мај го назначија досегашниот белгиски премиер, Шарл Мишел за претседател на Европскиот Совет, на местото на Доналд Туск. Мишел и Рејндерс се од истата партија.
Социјалистите во Белгија ја предлагаат Лорет Онкелинкс, една од најистакнатите фигури во партијата и повеќе пати министерка во претходните федерални и регионални влади.
Социјалистите потсетуваат и дека Фон дер Лејн побара од земјите членки на ЕУ да понудат 50 отсто жени кандидатки.
Сите земји членки треба да предложат кандидат до 26 август.