САД ја следат ситуацијата на Хаити по „трагичниот напад“ како резултат на кој беше убиен претседателот на земјата Жовенел Мојз, изјавија денеска од Белата куќа. Според извештаите, била ранета и неговата сопруга, Мартин Мери Етјен Жозеф, која според последните извештаи е жива, но во критична состојба, иако во текот на денот имаше информации дека им подлегнала на повредите.
-Засега собираме информации, прецизираше портпаролката Џен Псаки.
Главниот републиканец во Комисијата за надворешна политика на Претставничкиот дом, Мајкл Мекол, изрази загриженост поради убиството на претседателот.
Претседателот на Хаити денеска во раните утрински часови беше убиен од непознати лица во неговата приватна резиденција.
Група од неидентификувани лица, кои според амбасадорот на Хаити во САД биле „добро обучени, професионални командоси кои можеби веќе ја напуштиле земјата“, ја нападна резиденцијата на шефот на државата околу еден часот по полноќ. Моиз беше смртно погоден од огнено оружје. На неколку снимки од нападот кои се појавија на социјалните мрежи, се слуша како напаѓачите, непосредно пред атентатот, се претставуваат како агенти на американската Агенција за сузбивање на дрогите (ДЕА).