Американскиот потпретседател Џо Бајден препорача Американците да не купуваат автоматско оружје туку сачмарки.
Бајден, кој е на чело на комисија задолжена за предлог за посилна контрола врз оружје, сугестијата ја даде одговарајќи на прашања поставени на страничка на Фејсбук.
Тој вели дека има две сачмарки и ги држи заклучени на имот во Делавер, и оти на сопругата Џил и дал прецизни упатства што да прави ако се појават „проблеми“.
– Живееме во обаласт која е пошумена и издвоена. И реков на сопругата дека кога ќе помисли оти постои проблем, едноставно да излезе пред домот и да отвори оган од двете цевки. Гарантирам дека по тоа кој да тргне накај куќата, веднаш ќе се откаже. Не ни е потребно борбено оружје и не ви требаат 30 куршуми за заштита. Купете сачмарка, советува Бајден.
Американскиот потпретседател е задолжен за спроведување план на Обама за намалување на насилствата по масакрот во основно училиште во Њутаун во Конектикат кога во декември напаѓач уби 20 деца и шест возрасни лица.