Арапската лига ќе има вонреден состок в сабота по барање на Египет во врска со турската офанзива во североисточна Сирија, се вели во соопштението на таа организација.
Египетското Министерство за надворешни работи вчера „остро ја осуди турската агресија против сириската територија“, истакнувајќи дека офанзивата „е флагрантен и неприфатлив напад врз суверенитетот на братска арапска земја“.
Египетскиот претседател Абдел Фатах ал-Сиси вчера во телефонски разговор разговараше за турската операција со неговиот ирачки колега Бархам Салих, изјави портпаролот на претседателот.
„Турската агресија е опасен развој што го загрозува меѓународниот мир и безбедност и ја влошува кризата во регионот“, рече портпаролот.
Арапската лига, во која членуваат 22 земји, вклучувајќи ги Египет, Ирак и Саудиска Арабија, соопшти синоќа дека средбата в сабота ќе биде на министерско ниво и ќе се разговара за „турската агресија“ врз сириска територија.