Европското регулаторно тело ЕМА денеска ја препорача вакцината против Ковид-19 од фармацевтските компании Фајзер и Бионтек.
ЕМА препорача Европската комисија сега да додели условно одобрение за ставање во промет на вакцината, што треба да се случи за два дена.
Земјите-членки на Европската унија, од кои речиси сите набавија или набавуваат од вакцината на Фајзер и Бионтек, мораат да го имаат одобрувањето на ЕМА за да почнат да ги користат вакцините.
Во соопштение, ЕМА вели дека агенцијата направила „ригорозна“ евалуација на вакцината и дека се задоволни со количеството на податоци што ги добиле од компаниите за квалитетот, безбедноста и ефикасноста.
„Денешните позитивни вести се важен чекор напред во нашата борба против оваа пандемија, која предизвика страдања и потешкотии за толку многу луѓе,“ вели во соопштението Емер Кук, извршната директорка на ЕМА.
„Ова го постигнавме благодарение на посветеноста на научниците, лекарите, развивачите и волонтерите на тестовите, како и на многу експерти од сите земји-членки на Унијата,“ додава таа.
Дистрибуцијата на првите вакцини против Ковид-19 меѓу земјите-членки на ЕУ би започнала исто така на 26 декември, а вакцинациите еден ден подоцна, велат од ЕМА. Во Брисел потенцираат дека условите за вакцинација ќе зависат од националните стратегии на земјите-членки.
Вакцината Комитнати, произведена од Фајзер и БионТек, што денеска беше препорачана за употреба од Европската агенција за лекови (ЕМА), покажува ефикасност од 95 проценти во спречување на заразата со Ковид-19 кај лица постари од 16 години.
– Од вакцината се даваат две дози во период од 21 дена и не покажа сериозни несакани ефекти, соопшти ЕМА.
Во испитувањето на вакцината Комитнати учествуваа околу 44.000 луѓе, од кои половина примиле вакцина, а половината плацебо. Ефикасност имала кај повеќеод 36.000 луѓе постари од 16 години, вклучително и лицата постари од 75 години, кои немале знаци на претходна инфекција.
Студијата покажа дека за 95 отсто е намален бројот на симптоматски случаи на Ковид-19 кај лицата кои примиле вакцина, осум од 18.198 случаи добиле симптоми на корона, додека плацебо примиле 18.325 од кои 162 луѓе имале симптоми на Ковид-19.
Испитувањето покажа околу 95 отсто ефикасност кај учесниците со ризик од тежок облик на Ковид-19, вклучително и лицата со астма, хронични белодробни болести, дијабетeс, висок крвен притисок или индекс на телесната маса над 30.
ЕМА истакнува дека вакцината има висока ефикасност како меѓу половите, така и помеѓу расите и етничките групи.