Јапонскиот премиер Шинѕо Абе ја предупреди Африка за презадолженост, осврнувајќи се на големите кинески инвестиции на континентот за кои некои сметаат дека ја ослабуваат финансиската состојба на земјите во развој.
– Ако партнерските земји се длабоко задолжени, тоа ги спречува сите напори да влезат на пазарот, изјави Абе пред африкански лидери собрани на Меѓународната конференција за развој на Африка во Јокохама.
Тој ја искористи можноста да го промовира финансирањето што го нудат јапонските институции со поддршка од владата, и ги нарече „квалитетни“ инвестиции.
Според него, Јапонија планира да обучи експерти за финансиски ризик и управување со долгови во 30 африкански земји во следните три години.
Токио сака да го засили своето присуство во Африка, каде јапонските инвестиции се далеку од кинеските. Минатата година, Пекинг вети 60 милијарди американски долари инвестиции на самитот Кина и Африка.