Илјадници навивачи на Челзи, гневни поради одлуката на клубот да ѝ се приклучи на новоформираната Суперлига, откажувајќи се од учеството во Лигата на шампиони на УЕФА, се собраа денес пред стадионот „Стемфорд бриџ“ за да го изразат својот револт.
Трустот на навивачите го осуди потегот на клубот, кој заедно со другите најбогати европски клубови, се одлучи за новото натпреварување, кое би требало да донесе поголем профит за клубовите.
Навивачите го блокираа излезот од стадионот и не дозволуваа да помине клупскиот автобус, а залудни беа и апелите на легендарниот голман Петр Чех да ги пуштат фудбалерите да поминат.
Chelsea fans in action #cfc pic.twitter.com/inUfZDV0G2
— Jacob Steinberg (@JacobSteinberg) April 20, 2021
Пред мечот против Брајтон, навивачите му направија „опсада“ на својот стадион, а од транспарентите можеше да се види дека потегот на нивниот клуб го сметаат за чин на „најголемо предавство“, што за нив е нешто „непростливо“.
Слични беа реакциите и на останатите пет англиски клубови кои најавија приклучување кон Суперлигата, замислена како друштво на богатите клубови од кое нема да се испаѓа, а клубовите од посиромашните европски земји воопшто ќе немаат пристап.
Противење на идејата за посебна лига за најбогатите деновиве доаѓаат од цела Европа, а поддршка за УЕФА даде и претседателот на Фудбалската асоцијација на Англија, принцот Вилијам.