Несекојдневно насилен почеток имаше мечот од кошаркарската АБА лига меѓу Будуќност од Подгорица и српскиот тим Мега, одигран вечерва.
На половината на првата четвртина, по само пет минути игра, кошаркарот на Мега Филип Петрушев заврши една акција со забивање, по што му дофрли нешто на центарот на Будуќност, Вили Рид. На изненадување на сите присутни, Американецот одговори со брутален удар со бокс со сета сила во градите на младиот српски репрезентативец. По ова, поранешниот НБА-кошаркар беше ескпресно исклучен.
Инцидентот како да им даде поттик на кошаркарите на Мега, кои во тој момент започнаа серија од 15:2, а контролата врз мечот ја задржаа до крајот, нанесувајќи ѝ го на екипата од Подгорица првиот пораз оваа сезона во АБА лигата – 78:72.