ВИДЕО: Драма во Париз – Циципас потклекна по пет сета, Ѓоковиќ оди во финале против Надал

Од:

Во неверојатно возбудлив меч вечерва во Париз, најдобриот светски тенисер Новак Ѓоковиќ уште еднаш ја покажа својата ментална цврстина и по безмалку четири часа, успеа да го совлада жилавиот Грк Стефанос Циципас, скршувајќи го неговиот отпор во петтиот, решавачки сет.

Мечот, кој изобилуваше со одличен тенис и многу незаборавни потези и поени, започна одлично за Ѓоковиќ, кој поведе со 2:0 во сетови (6:3 и 6:2).

Изгледаше дека српскиот тенисер ќе има лесна задача против Циципас, кој делуваше како исплашен од важноста на мечот и од големиот противник.

Но, веќе во третиот сет, Гркот, кој се бореше за своето прво гренд слем финале, покажа зошто е во светскиот врв и го доби со 7:5. Слично се одвиваше и четвртиот сет, кој Циципас го освои со 6:4 и го израмни мечот – 2:2.

Сепак, искуството и умешноста на светскиот рекет број еден му донесоа брејк во четвртиот гем од одлучувачкиот сет – Ѓоковиќ поведе со 3:1, а младиот предизвикувач остана без освоен гем до крајот на сетот и мечот – 6:1.

Ѓоковиќ, кој досега има една титула на „Ролан Гарос“, ќе го игра своето петто финале на турнирот. „Џокерот“ Ноле годинава има скор 16-1 на гренд слем турнирите, а единствениот меч што го загуби е дисквалификацијата на УС Опен.

Таму Србинот ќе ги одмери силите со својот стар ривал, Рафаел Надал. Шпанецот е во феноменална форма во Париз, каде има неверојатни 31 победа во низа, а ова ќе биде негово четврто финале по ред на турнирот, кој го има освоено рекордни 12 пати.

Финалниот дуел во недела во 15 часот ги исполнува сите предуслови да биде уште една епска битка меѓу двете тениски легенди.

Би можело да ве интересира

Ѓоковиќ: Подготвувањето за овој турнир и сè со што морав да се соочам во последните неколку недели беше психолошки и емоционално тешко

Ана Ололовска

Надал за однесувањето на Ѓоковиќ: Кога сте пример за многу деца, не е добра слика да го фрлате рекетот

Ѓоковиќ без проблеми се пласира во осминафиналето на Олимписките игри во Токио

Мери Јордановска

ВИДЕО: Ѓоковиќ го подари победничкиот рекет на девојче од публиката

Мери Јордановска

Новак Ѓоковиќ влезе во историјата, го освои Вимблдон!

Мери Јордановска

Седмо финале за Ѓоковиќ на Вимблдон

Мери Јордановска