Половина екипи од елитната фудбалска лига во Молдавија биле вклучени во местење натпревари, објавија денеска Европол и молдавските власти задолжени за борба против корупција.
Досега се уапсени четири лица, извршени се претреси во 34 приватни станбени објекти и седиште на еден прволигашки клуб, а запленети се десетина мобилни телефони, како и обемна документација и банкарски картички.
Според истрагата, станува збор за корупциска шема од големи размери во која биле вклучени пет од десетте молдавски прволигашки екипи.
Наместени биле најмалку 20 натпревари во изминатите пет месеци, со вмешаност на раководните луѓе на екипите, тренери, менаџери, фудбалери и посредници.
Облозите за наместените натпревари биле уплатувани на азискиот пазар на обложувалници, а се проценува дека нелегалната заработка до разоткривање на корупциската шема достигнала околу 600.000 евра.