Македонските фудбалери попладнево го одржаа првиот тренинг на Националниот стадион во Букурешт, на кој во недела од 18 часот, против Австрија го игра првиот натпревар на едно Европско првенство во историјата на нашата репрезентација.
Македонските фудбалери претпладнево со чартер лет пристигнаа во романската престолнина, која во следните десет дена ќе биде база на „црвено – жолтите“ на ЕУРО2020.
По воведниот дуел против Австријците во рамки на групата Ц, избраниците на селекторот Игор Ангеловски на Националниот стадион во Букурешт на 17 јуни играат против Украина, по што составот се сели во Амстердам за мечот против домаќинот Холандија на 21 јуни.
Европското првенство почнува во четврток со натпреварот меѓу Италија и Турција во Рим.