Овој викенд на 2 април ќе се одржи петтото издание на ултимативната планинска трка во скопскиот регион – Водно-Матка Треилс.
Водно-Матка Треилс претставува планински тркачки предизвик кој ве носи низ најубавите, но воедно и најтешки планински патеки и предели на планината Водно и кањонот Матка – двете најпосетувани и најчести локации за спорт, рекреација и одмор во близина на градот Скопје.
Малиот јубилеј – 5 години Водно-Матка Треилс е закажан за оваа сабота, со почеток од 7 часот наутро до 18 часот попладне. Главните активности ќе се одвиваат на старт/финиш зоната на Средно Водно (во склоп на Даре Бомбол), но тркачи ќе има низ цело Водно и околу кањонот Матка.
На репертоарот оваа година се три трки од 40, 27 и 10 километри со соодветен старт во 7, 8 и 9 часот наутро. Стартните листи се затворени и објавени тука, а Водно-Матка оваа година очекува 520 тркачи од дваесетина држави. Во склоп на настанот ќе се одржи и мала журка со бендот The Hounds Која ќе започне во 13 часот.