По најавените промени на Гренд слем турнирите се огласи во моментов најдобриот играч во светот, Рафаел Надал. Шпанецот не е најсреќен од воведување часовник што ќе го мери времето за сервирање меѓу два поена.
– Ова не ми се допаѓа. Не е исто да се игра на 40 и 15 степени. Постојат ситуации и услови на кои секој играч се прилагодува на секој турнир и секој натпревар. За такви работи отсекогаш сме имале судија. Мислам дека овој часовник не може да придонесе за одличен натпревар. Се разбира, ако не сакате големи натпревари, тогаш тоа е прилично добра идеја, вели Надал.
За време на мечевите часовник ќе го одбројува времето да не се надминат дозволените 25 секунди за сервис меѓу два поени.
Ќе се мери и дозволеното време од една минута за влез на теренот, пет минути загревање и една минута подготовка за почеток на мечот.
За тенисерите кои нема да се придржуваат до овие времиња ќе следуваат парични казни кои можат да достигнат до 20 илјади долари.