Лионел Меси со три постигнати гола е најзаслужен за победата (3:1) на Аргентина над Еквадор остварена ноќеска во Кито по која „гаучосите“ во последен момент обезбедија пласман на Светското фудбалско првенство 2018 во Русија.
Домаќините први поведоа со голот на Ромарио Ибара уште во 1. минута, но тогаш стапи „спасителот“ на Аргентина и со погодоци во 12. 20. и 62. Минута на својот национален тим му ја донесе една најважната победа во последно време.
Учеството на Мундијалот со победи го потврдија Бразил против Чиле (3:0) и Уругвај над Боливија (4:2), а четвртата селекција од Јужна Америка со директен изборен пласман е Колумбија која ноќеска одигра 1:1 со Перу.
Токму Перу како петто пласиран ќе игра бараж, додека Чиле и Парагвај кој на домашен терен загуби од Венецуела (0:1) останаа без СП.