Капитенот на Барселона, Лионел Меси, откри во интервју за шпанските медиуми дека има потреба од приватност.
– Свесен сум и благодарен за поддршката што ја имам ширум светот, но би сакал да бидам анонимен, да можам со децата да отидам во кино, во продавница, ресторан … Точно е дека сум привилегиран поради животот што го имам, но постои и другата страна. Мојот живот честопати не е само моја приватна работа, изјави Меси во интервју за телевизиската станица „Ла Секста“ (La Sexta).
Меси во разговорот откри и оти најдобра соработка во кариерата имал со Пеп Гвардиола и Луис Енрике.
– Пеп Гвардиола имаше нешто посебно, тешко e дури и да се објасни. Имаше исклучителен пристап кон играчите, неговите тактички реакции беа едноставни, а многу продуктивни. На секому му беше јасно што треба да прави и како да стигнеме до резултат. И Луис Енрике беше сличен. Од нив научив како да го разберам фудбалот, покрај нив напредував и како играч, рече Меси.