Таеквондистот Дејан Георгиевски е вториот македонски спортист кој обезбеди настап на претстојните Олимписки игри во Токио, откако денеска триумфираше во категоријата над 80 килограми на квалификацискиот турнир во Софија.
Георгиевски ја обезбеди олимписката норма, прва во историјата за македонското таекводно, на денот кога го прославува својот 22. роденден со максимален ефект, совладувајќи го, притоа, во финалето со 13:6 актуелниот олимписки шампион Радик Исаев од Азербејџан.
Претходно борачот Могамедгаџи Нуров избори норма за Игрите во главниот јапонски град.
На олимписките квалификации во Софија вчера настапија и Филип Додевски во категоријата под 80 килограми и Анамарија Георгиевски во категоријата под 67 килограми.