Претседателот на Хрватска, Иво Јосиповиќ во својата резиденција денес ги прими претставниците на фудбалските сојузи на Хрватска и Србија.
Тој најави дека натпреварот ќе го гледа со поранешниот претседател на Србија, Борис Тадиќ, за кого кажа дека е во минување, на патот до Словенија.
Претседателот на ФСС Томислав Караџиќ на почетокот на приемот на Јосиповиќ му поклонил дрес од фудбалската репрезентација на Србија, како и шише ракија.
На средбата со Јосиповиќ присуствувале и претседателот на ХНС Давор Шукер, извршниот претседател на ХНС Дамир Врбановиќ и генералниот секретар на ФСС, Зоран Лаковиќ.
-Голем ден за спортот, играат две одлични репрезентации. Убеден сум дека спортистите на теренот ќе уживаат. Се надевам дека и атмосферата ќе биде на висина на квалитетот на репрезентациите – изјави Јосиповиќ.
Караџиќ истакна дека како што се односите помеѓу официјалните лица на сојузите, така треба да биде и во сите сфери на животот во двете држави.
-Односот помеѓу луѓето кои што го водат српскиот и хрватскиот фудбал е на највисоко можно ниво и претставува модел на добри односи. Сакам такви релации да бидат и во другите сфери и помеѓу луѓето кои што работат сериозни работи – изјави Караџиќ.
Елена Георгиевска