Најдобриот тенисер на светот Новак Ѓоковиќ и најдобриот тенисер во историјата на Ролан Гарос Рафаел Надал оваа година меѓу себе ќе играат во четвртфиналето на турнирот во Париз. Синоќа во мечевите од осминафиналето и двајцата постигнаа победи.
Ѓоковиќ го победи Ришар Гаске со 3:0 во сетови и притоа загуби само шест гема (6:1; 6:2; 6:3).
Надал загуби еден сет во мечот со Џек Сок – 3:1 (6:3; 6:1; 5:7 и 6:2).
На машкиот дел од турнирот немаше изненадувања и сите фаворите се пласираа во четвртфиналето.
Енди Мареј ќе игра против Давид Ферер, Кеи Нишикори против Жо-Вилфред Цонга (само Цонга го елиминира Томаш Бердих од првите осум носители) и Рожер Федерер против Стан Вавринка.
Во женска конкуренција имаше неколку изненадувања, па во осминафиналето беа елиминирани Марија Шарапова и Петра Квитова.
Денеска на програмата се по два четвртфинални меча во двете конкуренции: Ана Ивановиќ игра против Елина Свитолина и Гарбине Мугуруза за ривалка ја има Луси Сафарова кај жените и Нишикори – Цонга и Федерер – Вавринка кај мажите.