Поранешниот светски тенисер број еден, Британецот Енди Мареј, размислува да учествува на Отвореното првенство во САД и Ролан Гарос оваа година, но само доколку е доволно безбедно, со оглед на пандемијата на коронавирусот што го потресе и тенискиот свет.
Турнирот во САД ќе се одржи без навивачи меѓу 31 август и 13 септември во Њујорк, додека Отвореното првенство на Франција започнува во Париз на 27 септември, а финалето е на 11 октомври.
„За мене, грен слем-турнирите се приоритет. Распоредот е малку чуден, но има причини за тоа. Мене лично не ми пречи да играм на двата турнира, сè додека е безбедно. Можеби ќе може да се постигне тоа, штом ќе можам да донесам со мене уште еден човек. Мислам дека тоа треба да биде физиотерапевтот, затоа што тренерските инструкции можат да се дадат од далечина, изјави Шкотланѓанецот за британските медиуми.