Во натпреварот од првото коло од англискиот фудбалски шампионат, еден од фаворитите за титулата лондонски Арсенал на својот терен стаса до победата од 2-1 против Кристал Палас со победничкиот погодок постигнат во судиското продолжение.
Гостинскиот Кристал Палас поведе со голот на Бред Хенгаланд во 35-та минута, а потоа „топчиите“ направија целосен пресврт со головите постигнати во судиските продолженија на првото и на второто полувреме. Изедначи Лорен Кошчиелни по истекот на 45-та минута, а голот на одлуката го постигна Арон Ремзи по истекот на 90-та минута.
За одбележување е што Арсенал беше единствениот домашен тим кој во првите седум натпревари од новиот англиски шампионат оствари победа.
Манчестер Јунајтед, имено, во првиот натпревар во саботата предводен од новиот менаџер – Холанѓанецот Луј Ван Гал, загуби на својот „Олд Трафорд“ од Свонси Сити со 1-2, со што првпат по 42 години го започна првенството со пораз. Головите за првата премиерлигашката победа на Свонси на „Олд Трафорд“ ги постигнаа Ки Сунг-Јуенг во 28-та и Гилфи Сигурдсон во 72-та минута, додека за „црвените ѓаволи“ изедначи Вејн Руни во 53-та минута.
Хал Сити во гости го совлада Квинс Парк Ренџерс со 1-0 со голот на Џејмс Честер во 52-та минута. Вест Хем на свој терен беше поразен од Тотенхем со 0-1, иако домашните во 30-та минута имаа пенал и играч повеќе бидејќи Кили Нејтон доби црвен картон поради играње со рака во својот шеснаесетник. „Спарсите“ до победата дојдоа со погодокот на Ерик Диер во третата минута од судиското продолжение на мечот. Гостинска победа вкнижи и Астон Вила на гости кај Сток Сити, а единствениот гол на мечот го постигна Андрес Вејман во 50-та минута.
Лестер Сити и Евертон одиграа 2-2, иако гостите од Ливерпул двапати беа во водство. Евертон поведе со голот на Ејден Мекгиди во 21, но веќе во следниот напад изедначи Леонардо Улоа, потоа во последната минута од првото полувреме гостите поведоа преку Стивен Најсмит, а конечниот резултат го постави Крис Вуд во 86-та минута.
Истиот резултат (2-2), беше постигнат и на натпреварот меѓу Вест Бронвич Албион и Сандерленд. И на овој меч гостите поведоа, преку Ли Катермол во 5-та минута, по што израмни Саидо Берахињо во 42-та минута од пенал. Истиот играч во 74-та минута беше заслужен за пресвртот на ВБА, но во 85-та минута изедначи Себастијан Ларсон.
Во недела играат Ливерпул – Саутемптон и Њукасл – Манчестер Сити, а во понеделник играат Барнсли и Челзи.