Во Косово може да се влезе само со потврда за три вакцини или две вакцини и ПЦР тест

Од:

По наглото зголемување на бројот на заболени од Ковид-19, Косовската Влада вечерва донесе нови мерки за спречување на ширењето на пандемијата, според кои, меѓу другото, од утре за влез во државата е потребно да се приложи потврда за примени три дози вакцини, или две вакцини и негативен ПЦР тест, не постар од 48 часа, јави дописникот на МИА од Приштина.

Од обврската за приложување сертификати за вакцина при влез во Косово се ослободени лицата кои патуваат транзитно, странските дипломати, децата до 12-годишна возраст и лицата кои имаат лекарска потврда дека се ослободени од вакцинација.

Косовските државјани кои немаат примено две вакцини, по враќањето во земјата ќе треба да подлегнат на седумдневен карантин во своите домови. На сите вработени во јавните институции ќе им се бара сертификат за примени најмалку две дози.

Со новите мерки, таканаречениот полициски час, односно забраната за движење, наместо од полноќ, од утре ќе трае од 22 до пет часот наутро. Се скратува и работното време на угостителските објекти, кои, наместо до 23 часот како досега, ќе можат да работат до 21 часот, со тоа што музиката е дозволена до 20.30 часот.

Забранета е работата на ноќните клубови и организирањето на фестивали, концерти, свадби и веридби, додека на погребни церемонии е дозволено присуство само на најблиските роднини.

Одлуката стапува во сила утре, 22 јануари, и е со важност до 4 февруари.

Во своето образложение за новите мерки Владата се повикува на најновата епидемиолошка ситуација, по порастот на случаите со Ковид-19. Иако според Институтот за јавно здравство на Косово ситуацијата се смета за стабилна, сепак се вели дека опасноста останува, поради доминацијата на варијантата Омикрон на вирусот.

Последните денови во Косово имаше нагло зголемување на дневните бројки на заразени, така што само во петокот беа регистрирани 2.943 нови случаи, односно речиси 25 отсто од тестираните. Официјалната бројка на активни заболени во земјата, од околу 700, колку што изнесуваше пред две недели, вчера достигна до 12.396, додека медицинските експерти очекуваат задржување на негативниот тренд и во наредниот период.

Извор: МИА

Би можело да ве интересира

Германија испраќа дополнителни војници во Косово

Горан Наумовски

Уапсен Србин на Косово: Обвинет е за воени злосторства

Горан Наумовски

23-годишна Украинка пронајдена мртва на автопатот „Арбен Џафери“ во Косово

Катерина Ѓуровски

Вучиќ за Косово: На сите во лице им кажав што нема да исполниме од Охридскиот договор

Горан Наумовски

Косово одбележува 16 години од независноста

А1он

Во Брезовица загина поранешната скијачка Кетрин Ригби

Горан Наумовски