Неколку стотици демобилизирани борци кои протестираа пред зградата на Парламентот на Федерацијата Босна и Херцеговина денеска се судрија со полицијата.
До инцидент дојде откако учесниците на протестот ја блокираа главната крстосница во Сараево. Во судирите помеѓу полицијата и ветераните повредени се четворица специјалци, а две лица се уапсени, потврдија од полицијата на Кантонот Сараево. Според неофицијалните информации, повредени се и десетина учесници на протестот.
Од полицијата соопштија дека употребиле и солзавец, бидејќи дел од демонстрантите имале метални шипки.
Демобилизираните војници бараат да се закаже итна седница на двата дома на Парламентот со една точка на дневен ред- Усогласување на амандманите за Законот за демобилизирани војници и членови на нивните семејства.
Тие најавија дека пред зградата на Парламентот ќе останат се додека нивните барања не бидат исполнети. Борците ги повикуваат граѓаните на Сараево да им се придружат и прашуваат дали за тоа крвареле и ја дале младоста.
– Не прашувате која политичка партија стои зад нас? Ниту една. Нас политика не не интересира, само ги сакаме нашите правата. Повеќе од 20 години сме гладни, рекле поранешните борци на новинарите.