Албанската министерка за здравство, Огерта Манастирлиу ги посети повредените од денешниот земјотрес кои се хоспитализирани во болница во Тирана.
Таа информира дека ниту еден од повредените не е во сериозна состојба, јави агенцијата АТА.
Вкупно 68 лица добиле медицинска помош, од кои најмногу во Тирана и Драч.
Во болница во Тирана задржани се 21 граѓанин, а повеќето повредени се пуштени дома.
Албанија денеска ја погодија два земјотреси кои предизвикаа поголема материјална штета. Земјотресите ги почувствуваа и жителите на Македонија и Црна Гора.
Зграда во Тирана е евакуирана бидејќи по потресот се појавиле пукнатини, а делови од фасадата почнале да паѓаат. Во Драч и Тирана има оштетени куќи, а одредени домаќинства на кратко останале без електрична енергија.
Албанскиот премиер, Еди Рама, поради земјотресот ја откажа посетата за Њујорк, на годишниот состанок на Обединетите Нации.