Традиционалното обележување на Водици и пливањето по Светиот крст е одржано и во Земун, каде што прва до крстот дојде 18-годишната Јована Лепосавиќ од Белград, јавуваат српските медиуми.
Таа пред собраниот народ ја раскажа својата животна приказна, велејќи дека го победила ракот и дека овој Крст го посветува на сите кои боледуваат од оваа болест и оние кои не се повеќе меѓу живите.
– Ви благодарам на сите кои учествувавте и кои ми дозволивте прва да стигнам. Овој триумф ми значи многу бидејќи е во чест на моите другари кои се лекуваат од канцер и на оние кои не се повеќе со нас, рече Јована.
Меѓу 243 лица кои пливаа по светиот крст во водите на Дунав, Јована била единствената пријавена девојка, а момчињата и дозволија прва да стигне до крстот, кој според верувањата носи здравје и среќа.