Албанија продолжи да напредува и даде резултати. Реформата во судството и тековниот процес на проверка( ветинг) се примери за добра работа, изјави комесарот Оливер Вархеји во Комитетот за надворешни работи на Европскиот парламент, каде го презентираше годишниот извештај за проширувањето на ЕУ, јави Топ чанел.
Порачал дека сè уште треба да се работи на прашањата за реформите во правосудството, слободата на говорот, корупцијата, правата на сопственост, малцинските прашања и слободата на медиумите.
– Ова го кажавме и минатата година, но овие предизвици се важни за нас. Политичката посветеност и консензус на сите политички актери и независна и професионална администрација се од суштинско значење, рекол Вархеји.
Посебно ја поздравил Албанија што ја „задржала 100 отсто европската линија за војната во Украина”.